Lebanon ke naam...

ye ladai…
jhoot aur sach ki
ya sach aur sach ki…

tera jhoot…
teri taaqat usse sach banati hai
bas ek tera sach hi sach hai ab
kyunki who tankon aur topon se nikalta hai

aur mera sach…
kaun bolega?
kaise bolega?
kaun sunega unhein?

tumhari bandook ke shor mein
lahuluhan pada hai
tumhari barbarta ke junoon mein
daba pada hai
tumhari lagayee aag ke dhuyen mein
chhup jaata hai jo…
tumhare sipahiyon ki juton tale
raunda ja raha hai,
mera sach


woh sach
mera sach…

haan magar mera sach…
kabhi bachchon ki cheekh banke nikalta hai
maaon ke khushk aankhon se bahta hai
sadkon par lag rahe naaron mein garajta hai
mazloomon ki aahon mein sisakta hai

dabe kuchle jismon ke beech
khoon se latpathh bachchon ke beech
iss mulk ke malbon ke beech
kahin dafan hai mera sach…

apne wujud ke malbe mein dhundhta hun
main
apna sach…